Casa de Andrés

Esta presentación virtual é o recordo e homenaxe dunha xeración de profesionais do século XXI á súa familia de antepasados, agricultores e gandeiros da Casa de Andrés, que se remonta catro séculos atrás, na aldea de Ribeiras de Lea (Lugo), nunhas terras nas que creceron o centeo, trigo, millo, liño, herba, patacas, fabas, verzas, maceiras, perales, castiñeiros, toxos e outros produtos agrícolas que alimentaron aos seus moradores e ao gando (porcos, vacas, bois, eguas, cabalos e ovellas) co que se labraba a terra e se facía a matanza para o sustento alimentario.

Terras da propiedade familiar da Casa de Andrés, na parroquia de Ribeiras de Lea, do municipio lugués de Castro de Rei, nas que hoxe hai maceiras, castiñeiros, aveleiras, nogueiras e frondosas de varios tipos.

Na contorna da casa familiar, na denominada como Chousa da Casa de Andrés, medra unha pomarada de 1.500 árbores de maceiras de sidra e mesa plantados a partir de 2019.

O primeiro obxectivo deste proxecto é a conservación e continuidade da memoria familiar; e o segundo, contribuír a poñer en valor, desde a innovación e a sustentabilidade, a herdanza de sacrificio e fertilidade que esas terras deron a esta familia. Unha promoción simbólica, desde o local máis local que encarna unha pequena aldea da provincia de Lugo, á proxección global do espazo virtual, neste caso.

Desenvolvemento dun proxecto de fruticultura sostible e de varios produtos ecolóxicos derivados, xunto co apoio ao futuro rural e á promoción destas terras, de Castro de Rei, de Lugo capital e dun dos Camiños de Santiago que atravesa tamén parte desta comarca da Terra Cha.

LABRADORES DE 4 SÉCULOS De 1728 á construción da casa actual en 1900

A xenealoxía histórica da familia Campos documéntase máis aló dos últimos 4 séculos como agricultores e gandeiros da parroquia de San Xoán de Ribeiras de Lea (Castro de Rei), na comarca da Terra Cha, no centro da provincia de Lugo. A casa actual, rehabilitada en 2000-2002, data de 1900 e recibe o seu nome da orixe petrucial de Andrés Campos Sánchez (1846-1911), pai de Francisco Campos Teijeiro (1873-1967), avó de Román Campos Muinelo (1910-2004) e bisavó de Francisco Campos Freire (1952), cuxas fillas Ana Campos Blanco (1982) e Irene Campos Blanco (1983) continúan a vinculación familiar desde Londres e Madrid respectivamente.

A saga familiar documentada da familia Campos remóntase ao tránsito dos séculos XVII a XVIII, segundo os documentos parroquiais rexistrados polo párroco de San Xoan de Ribeiras de Lea, Darío Legaspi Fernández, pertencente ao Bispado de Mondoñedo. Deses séculos son os oitavos e sétimos avós rexistrados da familia, Francisco de Campos (nado en 1728) e a súa muller María López e Francisco Docampos e a súa muller Dominga Fernández, segundo os datos documentados da época.

A orixe da propiedade e actual casa familiar remóntase ao matrimonio de Andrés Campos Sánchez (1846) e María Teijeiro, naturais de Ribeiras de Lea e Mondriz respectivamente, parroquias ambas as dúas do municipio lucense de Castro de Rei. Continuada polo seu fillo Francisco Campos Teijeiro (1873-1911), casado con Engracia Muinelo Abelaira (1882-1963) e cuxo matrimonio tivo seis fillos: Román, José, Feliciano, Manuela, Fulgencio e Josefa. Deses irmáns, José e Manuela morreron moi novos.

Román Campos Muinelo (1910-2004) continuou a saga petrucial da Casa de Andrés, casado con Caridad Freire Salgado (1914-1997), procedente da Casa de Abilleira e tamén da parroquia de Ribeiras de Lea, e que tiveron como fillo único a Francisco Campos Freire (1952), casado en 1980 con María Angeles Blanco Lamas (1955), natural de Bestar (Cospeito), de cuxo matrimonio naceron Ana e Irene Campos Blanco. Seguen á saga familiar Pedro e Miguel Espejo Campos, nacidos en Madrid e bautizados en Ribeiras de Lea.

A saga actual da Casa de Andrés ten vinculacións de parentesco directo coas familias de Victoria Freire Campos, filla de Manuel Freire Salgado e Josefa Campos Muinelo; de Francisca Campos, filla de Feliciano Campos Muinelo e Lucrecia Candal Fernández; así como tamén de Teresa, Carmen e Marisa Blanco Lamas, fillas de José Blanco Fernández e Sara Lamas Ben.

Francisco Campos Freire licenciouse en 1978 na Facultade de Ciencias da Información, sección de Xornalismo, na Universidade Complutense de Madrid e, despois de exercer a actividade profesional en editoriais, xornais e televisión, ingresou como profesor na Facultade de Ciencias da Comunicación de Santiago de Compostela, na que alcanzou o grao de doutor e catedrático de Xornalismo. María Angeles Blanco Lamas licenciouse en Filoloxía Románica (rama de Francés) na Universidade de Santiago, dedicándose posteriormente a actividades administrativas e tamén docentes en diferentes centros de Galicia accedendo a catedrática do corpo de profesores de ensinanza secundaria. Ana e Irene estudaron graos e mestrados de Turismo/Ciencias do Traballo e Enxeñería, respectivamente.

O proxecto de rehabilitación e recuperación da Casa de Andrés e a súa facenda é un obxectivo de sustentabilidade e conservación da memoria da herdanza familiar enraizada e vinculada ás orixes familiares dos seus antepasados, concibida desde a perspectiva e a realidade dos status profesionais dos seus continuadores no século XXI. Para a súa execución foi necesario investimento, dedicación, formación e asesoramento técnico.